Айбат » Уинстон Черчилл: “Менин өтө так саатым – бул ашказаным”

Сиз кийинки беттесиз: Башкы бет » Тарых » Уинстон Черчилл: “Менин өтө так саатым – бул ашказаным”

Уинстон ЧерчиллУинстон Леонард Спенсер Черчилл (орусча – Черчилль, англисче – Churchill; 1874-1965), журналист, публицист, жазуучу, сүрөтчү, коомдук ишмер, мыйзамчы, Британиянын эки жолку өкмөт башчысы, адабият тармагындагы Нобел сыйлыгынын ээси. Улуу Британиянын даңазалуу мамлекеттик ишмери.

Уинстон Черчилл

Кийин да (1951-55) Черчилл Улуу Британиянын өкмөт башчысы болгон.

1955-жылдын 5-апрелинда ал өкмөт башчысы кызматынан кетүү тууралуу арызын берген.

1964-жылы 27-июлда акыркы ирет Британ парламентинин лорддор үйүндө (палатасында) отурумга катышкан.

1953-жылы 24-апрелде Черчиллге Британиянын канышасы “лорд” даражасын ыйгарат, ошондон тартып анын ысымына “сэр” деген сый наам кошулуп айтылып калган.

1953-жылы 10-декабрда Черчилл адабият тармагындагы Нобел сыйлыгына татыган (ага атаандаш көрсөтүлгөн талапкер – америкалык жазуучу Эрнест Хемингуэй болгон, бул жазуучу кийинки жылы Нобел сыйлыгын алган).

Черчилль коллекциясы 1.8 миллион фунтка сатылган.

Англиянын мурдагы премьер-министрлеринен Уинстон Черчилль тарткан картина да орун алган коллекция, Лондондогу «Сотбис» аукцион үйүндө 1.8 миллион фунтка сатылды.

Чартвеллде япон балыгы бассейни«Чартвеллде япон балыгы бассейни» аттуу картина 1.4 миллион фунтка сатылса, Черчилль колдонгон пилдин тишинен кооздолуп жасалган тамеки кутусу да 20 миң фунтка сатылды.

Черчилль колдонгон кызыл тери менен капталган атайын куту болсо 158 миң фунтка сатылды.

Черчилл 1965-жылы 24-январда дүйнөдөн кайткан.

Черчиллдин таамай жана азил сөздөрү

Уинстон Черчиллдин чукугандай тапкан сөздөрү, азилдери да тарыхта калды.

Достор жана көркөм өнөр

Бир жолу драматург Жорж Бернард Шоу Черчиллге өзүнүн жаңы пьесасынын премьерасына чакырык жиберип, катка мындайча сөз жазып койгон экен:

“Өзүңүз менен кошо досуңузду ала келиңиз, бирок андай досуңуз бар экенине күмөнүм бар”.

Черчилл болсо жооп кылып мындайча куш тилиндей кат жөнөтүптүр:

“Ка-ап, бул кечте мен бош болбой калбадымбы! Албетте, мен пьесанын сахнага экинчи жолку коюлушуна кубануу менен барууга даярмын, бирок андай учур болооруна күмөнүм бар”.

 

Уинстон ЧерчиллИндиялыкпы же индейби?

Тээ 1943-жылы Вашингтондо Ак Үйдө Черчилл конок катары сый тамакта отурганда, ага Хелен Огден Миллз Рид деген айым кайрылып калат. Бул айым “Чикаго трибун” гезитинин британдарды жаман көргөндүгү менен белгилүү ээсинин карындашы болчу.

Айым Улуу Британияны Индиянын элине карата өтө ырайымсыз саясат жүргүзүп жатат деп сынга алат.

Ошондо Черчилл берки айымга мындайча жооп кайтарган экен:

“Урматтуу айым (Мадам), сөзүбүздү андан ары улантуудан оболу тактоо киргизип алышым керек болуп турат. Деги мен сиздин сөздү туура уктумбу же жокпу?

Сиз “индиялык” деген сөздү колдонуп, Индиянын өңү каратору калайыгын – британдык бакыбат башкаруунун шарапаты менен ырааттуу түрдө жана ал түгүл тим эле коркунучтуу деңгээлге чейин саны өсүп жаткандарды – айтып жатасызбы, же аталышы окшош болгон “индейлерди” – Американын кызыл терилүү тургундарын, менин аңдаганыма караганда, Кошмо Штаттарда дээрлик кырылып жок боло жаздаган калкты – айтып жатасызбы?

 

Балыктын кара уругу

Улуу Британия, АКШ жана СССР гитлердик фашизмге каршы ынтымак түзгөн жылдары Иосиф (англисче – Жозеф, кыскача Жо) Сталин британ өкмөт башчысы Черчиллге балыктын кара уругун байма-бай жиберип турган экен.

Черчилл кызматтан кетип, парламентте оппозицияда жүргөн учурунда, 1946-жылы 5-мартта АКШнын Миссури штатындагы Фултон шаарында жайгашкан Вестминстер коллежинде даңазалуу “Дүйнөнүн булчуңдары” аттуу сөзү менен чыгып сүйлөйт.

Черчиллдин дал ушул сөзү “кансыз согушка” – Батыш менен Советтер Биримдигинин идеологиялык тирешүүсүнө жана жарыша куралдануу дооруна башат ачкан деп айтылып жүрөт.

Ошондон көп узабай Черчилл америкалык “Тайм” журналынын кожоюну уюштурган сый тамакта отуруп калат.

Британ мамлекеттик ишмери кашыгына балыктын кара уругунан мелт-калт кыла сузат да, жылмайа айтат:

- Билесиңерби, Жо байке (Иосиф Сталин) бул даамдуу нерсени мага үзбөй жана, баса белгилеп айтсам, өтө арбын салып тураар эле. Эми мага бул уруктун бир даны түгүл, таш-балакет да жок болот!

 

01195277.jpgТактыктын сыры

“Сиз эмне үчүн ушунчалык таксыз?”

Бул суроого Черчилл мындайча жооп узаткан экен:

- Менин өтө так саатым – бул ашказаным. Маселен, дал ушул көз ирмемде ашказаным мага түшкү саат бир болгонун жана түштөнүү маалы келгенин айтып жатат.

 

Уинстон Черчилл, Иосиф СталинАрмян конягы жана Сталин

Бир жолу Сталин Черчиллге армян конягын жибериптир. Анысы жагып калган экен, Черчилл мактаптыр.

Анан Сталин улам армян конягын жибертип туруптур.

Бир жолу Черчилл “баягы конягың бузулду” дейт.

Сталин текшертсе, коняк чыгарган “Двин” ишканасынын технология башчысы Маркар Седракян Сибирге айдалган экен да, коняк сапаты өтө начарлаптыр.

Анан Сталин Седракянды кайра Сибирден Ереванга алдыртып, ага Соцэмгек баатыры наамын бердиртиптир.

Черчилл коняк ичпей калса, анда армян конягы Бишкектикине таптакыр караандабай калмак экен! :)

 


Кыскача өмүр баяны

Уинстон Черчилл 1874-жы-
лы 30-ноябрда Бленхейм аксарайында туулган. Бул аксарай Малборо герцогдоруна таандык болгон.

Атасы – лорд Рэндолф Спенсер-Черчилл болсо жетинчи Малборо герцогунун үчүнчү уулу болгон жана учурунда британ парламентине мүчө жана каржы тармагын тейлеген канцлердин кызматын аркалаган.

Энеси деди Рэндолф Черчилл (кыз чагындагы аты – Женни Жером) болсо америкалык бай ишкердин кызы болчу.

Тарыхта Черчилл өтө оор кырдаалда – Экинчи дүйнөлүк согуш маалында (1940-45-жылдары) Улуу Британиянын өкмөт башчысы болуп, фашисттик Германияга каршы күрөштү эл аралык деңгээлде уюштурууга салым кошкон мамлекеттик ишмер катары өзгөчө орун ээлеп калды.

Айбат гезити №129



Башка окшош макалалар:

Комментарий калтыруу

Башкы бет | Саясат | Коом | Маек | Экономика | Кызыктар дүйнөсү | Шоубиз | Газета архиви | Байланыш
© 2015 Айбат.kg сайтында жайгашкан материалдар окуп-таанышуу үчүн гана арналган жана жалпыга таратуу «Айбат.kg» сайтынын жазуу түрүндөгу уруксаты менен гана мүмкүн.
Материалдарды көчүрүп алууда «Айбат.kg» сайтына шилтеме сөзсүз жазылуусу керек.
Сайт жаңылыктарына жазылууСайттагы комментарийлерге жазылуу
Designed & powered by bekturb VIB
Рейтинг@Mail.ru